Преставление преподобного МАКАРИЯ Жабынскогo
По рукописным святцам, «преподобный священноинок Макарий, начальник Жабынскаго монастыря Введения Пресвятой Богородицы, Белевский новый чудотворец, преставися в лето 7130 (1622) месяца января в 22 день». По синодику Белевской обители, «преподобный отец Макарий, Белевский чудотворец, в терпении иночески плотию страда, мраз, зной, в алчбе и жажде потерпе, монастырь возгради, братию собра, поживе в терпении своем лета довольна, преставнся в лето 7031 (1623), погребен ученики своими в своем от него созданием монастыре месяца ианнуария в 22 день».
Жабынский монастырь на устье речки Жабыни, впадающей в Оку, в пяти верстах от Белева, основан был в 1583 году старцем Онуфрием, но в 1614 году был разорен и сожжен без остатка, как и Оптина пустынь. Преподобному Макарию пришлось устроять все вновь на пустом месте, строить храм и кельи, собирать братию. Это нелегко и в другое время, а когда разорен был весь край, старцу пришлось долго переносить на пепелище и голод и холод, он все терпел для Господа, и пустынь Жабынская после того называлась Макариевою. Изображение преподобного Макария видно было даже на столпе храма девичьего Козельского монастыря. В синодике жабынском сказано и то, что преподобный Макарий «доныне сияет в чудесах».
КАНОН
Прп. Макарию Жабынскому
и Белевскому Чудотворцу.
Песнь 1
Ирмос: Во глубине постла иногда / фараонитское всевоинство преоруженная сила, / воплощшееся же слово всезлобный грех потребило есть; / Препрославленный Господь славно бо прославися.
Господь, Царь Славы, прославляющия его прославити обетова, / на тебе же, преподобне, обоя устроишася, / якоже бо ты прославил еси Господа в житии твоем, / сице и тя прослави тобою прославленный Господь.
Великий ангельский образ приял еси, / крайняго смирения не оставль в житии твоем, / с лики же ангельскими на Небеси ныне ликуеши. / За ны убо помолися, отче, / ангельскими хвалами Препрославленному Господу.
Трудами насадил еси, / слезами молитвенными оросив, яко сад Божий, обитель твою, преподобне. / Прими убо и наша слезы умиления / и ходатайственно вознеси я к престолу Препрославленнаго Господа.
Богородичен: К Богородице о нас помолися, отче преподобне, / да умолит Сына Своего помиловати нас, / славно да прославится в милости Своей Препрославленный Господь.
Песнь 3
Ирмос: Процвела еси пустыня, яко крин, Господи, / языческая неплодящая, Церковь / пришествием Твоим, / в нейже утвердися мое сердце.
Процвела есть Жабынская пустыня / за молитвы избранника Твоего, Господи, преподобного пустынножителя Макария, / в нейже да обрящем утешение, / здравие же и спасение заступлением преподобнаго.
Чудес дарованием благоволи Господь тя прославити, смиреннаго / и много лет яко бы забвенного, / да немощным нам подаст благовременную помощь / и вере нашей оскудевающей укрепление.
Богоносе отче Макарие, / Богу непрестанный о нас был еси молитвенник / и Пресвятаго Утешителя Духа в серце твоем носил еси. / Но убо воздвигни от сна греховнаго / и от искушения диавольскаго огради ны, молящияся тебе.
Богородичен: Богородительнице Благая, моли о нас / и наша недостойныя молитвы принеси ко Престолу Благаго Сына Твоего, / и Твоим да будет сомолитвенником о нас Макарий преподобный.
Седален, глас 4:
На твердем веры камени утвержден сый, / в безмолвии подвизаяся, течение постничества добре скончал еси / и мздовоздаяние от Христа приял еси, / Емуже ныне молися, всеблаженне, / в вере и добродетелех нас утвердити.
Слава, и ныне, Богородичен:
Ты покров мой от напастей вражиих, Владычице, / Ты свет сердцу моему, / печальми житейскими омраченному, присно буди, Богородице, и спаси мя.
Песнь 4
Ирмос: Пришел еси от Девы, не ходатай ни ангел, / но Сам, Господи воплощся, / и спасл еси всего мя человека. / Тем зову Ти: слава силе Твоей, Господи.
От Девы Пречистыя на землю пришел еси, во еже спасти нас, Господи, / и от спасенных великое множество прославил еси, / да не токмо Тя у Престола Твоего славословят, / но и о нас ходатайствуют. / Веруем убо, яко в сонме том пресветлом / предстательствует о нас преподобный отец наш Макарий.
От отечества нашего взят был еси в Небесное Царствие, отче преподобне. / Не забуди убо чад твоих, избранниче Божий Макарие, / еще пришельствующих на земли.
Буди с нами, отче наш Макарие, / да с тобою дерзновенно Бога Отца прославим, / Сына превознесем и Святому Духу поклонимся.
Богородичен: С Богородицею, вслед Ея мыслию во святая внидем / и к Ней со смирением притецем, в покаянии зовущее: / Спасительнице спаси нас.
Песнь 5
Ирмос: Ходатай Богу и человеком был еси, Христе Боже: Тобою бо, Владыко к Светоначальнику, Отцу Твоему, / От нощи неведения / приведения имамы.
Нощи неведения прешедшей приближися день спасения, / и Свет миру возсия – Христос Господь. / К сему убо ныне, молитвами преподобнаго Макария, / от греховныя нощи приведение имамы.
Нощию петлоглашение, / имже Господь пришествие Свое второе назнаменова, / к тебе Господь прииде душу твою прияти, преподобне, / молитвами же вложи в души наша память смертную.
Нощь многолетняя прейде, / в нюже бе под спудом память твоя отче наш, /но сия ныне явися, светящи всем, /яже в твоей храмине суть, / в нюже мы, верою и любовию влекоми, приведение имамы.
Богородичен: Не бойся малое стадо, / яко благоизволи Отец ваш дати вам Царство, глаголет Господь. / И не изнеможе глагол сей у Господа, / уже бо достиже завещанного Царства пастырь наш, да привлечет с собою все стадо свое молитвами Богородицы.
Песнь 6
Ирмос: В бездне греховной валяяся, / неисследную милосердия Твоего призываю бездну: / от тли, Боже мя возведи.
Бездна милосердия Божия бездну грехов наших да превозможет, / ничесоже от нас взыскующе, разве слез покаяния умиленнаго, / о сем помолися за ны, преподобне отче наш.
От бездны греховной помози нам, Боже, возникнути, молитвами преподобного Макария сподоби ны прежде конца покаятися / и Твоих Божественных Тайн причастником быти.
Славим Тя, Святая Троице, /и дивимся бездне милосердия Твоего к нам, много согрешающим. / Но еще долготерпи о нас, Боже наш, / дондеже покаемся со слезами, / присно поминающее последняя своя.
Богородичен: Чистую чисто почтим / устыдимся пред лицеем ея сквернаго жития нашего, отче преподобне! / Ты убо настави нас достойно чтити Матерь Божию Пречистую.
Кондак, глас 8:
Житие чистое, терпение, кротость и любовь нелицемерну, / воздержание совершенное, / умиление Божественное, / веру же и надежду истинну и милосердие стяжав, / равноангельно, Макарие, на земли пожил еси / и на Небеси Богови с лики Безплотных предстоиши. / С ними же, святе, молися / мир Российстей Церкви даровати / и душам нашим велию милость.
Икос:
Ангельски на земли поживша, / преподобнаго отца нашего Макария, придите, людие, сошедшеся, восхвалим, / сице к нему рекуще: / радуйся, на земли поживый небесно; радуйся, во плоти, аки безплотен подвизавыйся. / Радуйся, страсти до конца умертвивый и безтрастия достигнувый; / радуйся, душу дарованьми Духа Святаго исполнивый. / Радуйся обитель возградивый и иноков собравый; / радуйся, пастырским жезлом твоим во ограду Небесную тыя управивый. / Радуйся, града Белева похвало; / радуйся, пустыни твоея непоколебимое утверждение. / Радуйся, присно молящийся Господеви мир Российстей Церкви даровати / и душам нашим велию милость.
АКАФИСТ
преподобному отцу нашему
Макарию Жабынскому и Белёвскому
чудотворцу
Кондак 1
Преподобному отцу Макарию нашему составим похвалу, яко помощнику нашему и ходатаю пред Господом Богом. Ты же, угодниче Христов, не погнушайся пением нашим убогим и сам помогай нам и немощи нашей да зовем ти:
РАДУЙСЯ, Преподобие отче наш Макарие Жабынский чудотворче.
Икос 1
Ангелоподобное житие твое представляя, Преподобие отче в тишине пустынной провождаемое дерзаем с любовию вопите тебе:
Радуйся, житие жестокое в пустыни возлюбивый;
Радуйся, подвигом иноческим плоть свою изнуривый;
Радуйся, суету мира сего лукавого возненавидивый;
Радуйся, в молитвах бодрствуя, тело твое духови покоривый;
Радуйся, страны нашея украшение и прославление;
Радуйся, града Белева радость и веселие;
РАДУЙСЯ, Преподобие отче наш Макарие Жабынский чудотворче.
Кондак 2
Видяши житие твое, како воспоем чудеса твоя! Како же ты, видя в пустыни жаждою погибающего человека воду из камене, ударом жезла твоего извлекл еси и жаждущаго напоив заставлявши чудеси сему дивящися воспети Богу дивному во святых своих: Аллилуиа.
Икос 2
Разум не уразумеет каковую силу целебную даде Господь, источнику твоему, Преподобие отче, к нему же притекающие с верою и доныне исцелений сподобляются молитвами твоими, сего ради вопием ти:
Радуйся, Моисею в пустыни уподобивыйся воду из камене источивый;
Радуйся, жаждущаго тою водою обильно напоивый;
Радуйся, яко и до ныне воды источника твоего не оскудевают;
Радуйся, яко и до ныне помощию твоею воды сея недужных исцеляют;
Радуйся, скорый наш в скорбех помощниче;
Радуйся, теплый наш к богу молитвенниче;
РАДУЙСЯ, Преподобие отче наш Макарие Жабынский чудотворче.
Кондак 3
Сила Божия, дивно в тебе проявленная да поможет и нам немощным и убогим в молитвах бодрствуя пети о тебе Создателю нашему: Аллилуиа.
Икос 3
Имущи память смертную бдел не давая очесем твоим дремания ожидая: егда жених душ наших Господь приидет, имея светильник души твоея горящий, сего ради вопием ти:
Радуйся, сон от очес твоих усердно отгнавый;
Радуйся, в молитвах бодрствуя в нощи, в куроглашении дух твой господеви предавый;
Радуйся, примером своим нас унылых на подвиг призываеши;
Радуйся, сон ленности нашея от очес наших незримо отгоняеши;
Радуйся, многих заблудших на путь истины наставителю;
Радуйся, духов лукавых скорый прогонителю;
РАДУЙСЯ, Преподобие отче наш Макарие Жабынский чудотворче.
Кондак 4
Буря неверия, буря смущения и искушения потопляет корабль наш! Буди нам путевождь, Преподобие, среди волн житейского моря, и приведи нас в царство небесное, да воспоем спасающему нас Богу: Аллилуиа.
Икос 4
Слышавши глагол спасителя нашего: не бойся малое стадо, яко благоволи Отец ваш дати вам царство. Тебе честный, Отче, просим: — ты достигши царствия Отца твоего, не забуди малое твое стадо, да зовем ти:
Радуйся, пастырю наш добрый;
Радуйся, отец наш чадолюбивый;
Радуйся, яко ты со ангелы в вечной славе ликуеши;
Радуйся, яко нас заблудших твоих овец усердно взыскуеши;
Радуйся, яко помощию твоею и мы спасения получити чаем;
Радуйся, яко ходатайством твоим и мы прощения от Бога ожидаем;
РАДУЙСЯ, Преподобие отче наш Макарие Жабынский чудотворче.
Кондак 5
Яко боготечная звезда сияеши нам с высоты селения твоего Преподобие отче, и видиши яко зле страждем мы во гресех погибающи, друг другу досаждающи, брата ненавидящи, научи нас любви о Христе и смирению, да умиленно воспоим с тобою Богу: Аллилуиа.
Икос 5
Видиши ты отче, яко светильники душ наших угасают, суетою мира сего омраченныя, и пленницами враг души наша связав, во тьму кромешную всячески влечет! К кому прострем руце, к кому восплачем горце! Ты, отче, подвигнись к нашему неможению, да поем ти тепле:
Радуйся, всегда славы суетныя избегаяй;
Радуйся, и нас грешных тому же научаяй;
Радуйся, яко ради великого твоего смирения мало что из жития твоего известно людем;
Радуйся, яко с нами мощи твоя скрытыя под спудом;
Радуйся, яко духом твоим на месте подвигов твоих таинственно обитаеши;
Радуйся, яко всех приходящих к тебе с верою в скорбех утешаеши;
РАДУЙСЯ, Преподобие отче наш Макарие Жабынский чудотворче.
Кондак 6
Проповедает подвиги твоя, страна наша, честный отче, како поминая их не устыдимся скверного жития нашего, к ленности провождаемого греховными помыслами омрачаемого, где явимся тяготы и зноя дневного не понесши, како воспоим непотребными усты своими Творцу и Создателю своему: Аллилуиа.
Икос 6
Возсия пустыня Жабынская в древняя времена, юже некогда от варваров разоренную ты, святый отче, трудами своими возставил еси, тако и души наша от врага оскверненныя и опустошенныя укрепив возстави да зовем ти:
Радуйся, обитель благоукрашенную на месте пустем основатый;
Радуйся, множество иноков притекших к тебе во едино собравый;
Радуйся, яко путем тесным ведущим в Царство Небесное текл еси;
Радуйся, яко многих из братии своей с собою совлекл еси;
Радуйся, яко ты ангельски пожил еси, еще в бренном телеси;
Радуйся, яко радуешися с ними купно на небеси;
РАДУЙСЯ, Преподобие отче наш Макарие Жабынский чудотворче.
Кондак 7
Хотяй провозсияти тебе всеми добродетельми блаженне Макарие, владыка Христос, призвал тя на служение людям, да научиши их смирению и терпению их же сам стяжав, предстоиши Богу вопия за ны: Аллилуиа.
Икос 7
Дивна имуща тя воистину, отче, подвижника и молитвенника крепкаго с любовию взираем на место подвигов твоих и умиленно вопием ти сице:
Радуйся, благий и верный рабе винограда Христова;
Радуйся, отче всемилостивый не лишающий нас своего предстательства и покрова;
Радуйся, сирых помощниче и заступление;
Радуйся, свеща благодатию божиею возженная, освещающая нам путь ко спасению;
Радуйся, ни во что же вменивый земная, возлюбив небесная;
Радуйся, простираяся в горняя забывая телесная;
РАДУЙСЯ, Преподобие отче наш Макарие Жабынский чудотворче.
Кондак 8
Странно и чудно житие твое прешел еси на земли, Преподобие отче, не видя покоя в трудах своих и старец быв немощный неизреченного достигл еси на небеси, идеже со ангелы поеши богу: Аллилуиа.
Икос 8
Всею душею отдавшись Господу и всем житием послуживши ему, прославился еси благожитием своим в стране нашей сего ради вопием ти сице:
Радуйся, ангелом собеседниче;
Радуйся, усердный о нас к богу молитвенниче;
Радуйся, мощи твоя от поругания неизреченно сохранивый;
Радуйся, данный тебе от Бога талант во многажды усугубивый;
Радуйся, угодниче Христов благодатию просветленный;
Радуйся, светильниче елеем добрых дел преисполненный;
РАДУЙСЯ, Преподобие отче наш Макарие Жабынский чудотворче.
Кондак 9
Всякие утоли болезни и печали великий наш заступниче, Преподобие отче наш Макарие подаждь нам убогим хотя бы в мале последовати житию твоему, славу мира ни во чтоже вменяти и достигнув царствия небесного вкупе с тобою воспети богу: Аллилуиа.
Икос 9
Витий многовещанных уста не возмогут воспети тя по достоянию, колико же наша убозии языцы ублажат тя! Но ты, милостиве отче не отвратися от хваления нашего, да воспоим ти сице:
Радуйся, иноков помощниче и управителю;
Радуйся, в мире благотекущих милостивый вразумителю;
Радуйся, милостыню подавати нас научаяй;
Радуйся, забывати нищих и убогих нам возбраняяй;
Радуйся, шипок благовонный жабынския пустыни;
Радуйся, обитаяй с небесными земных не оставлявши и доныне;
РАДУЙСЯ, Преподобие отче наш Макарие Жабынский чудотворче.
Кондак 10
Спасти хотя душу свою Преподобие отче, ведый: яко неимущему любви к Богу, ни какими же подвиги получити спасение возможно: стяжал еси венец добродетелей — еже есть любовь к Богу, ему же предстоя ныне радостно вопиеши: Аллилуиа.
Икос 10
Стена еси всем человеком к заступленяю твоему прибегающим, Преподобие отче, темже и нам, к тебе притекающим и твоея помощи просящим. Буди стена крепкая, и ограждай от всех бед и напастей да с любовию поем ти таковая:
Радуйся воине Царя Небеснаго не обязывайся куплями житейскими, да ему угоден будеши;
Радуйся, яко аще и потрудился еси зде на земли ныне на небеси ликуеши;
Радуйся, яко единаго Господа во вся дни живота твоего искавый;
Радуйся, разве его ничесоже на земли и небеси желавый;
Радуйся, всю жизнь свою, яко раб пред лицем Господа своего ходивый;
Радуйся, Христа егоже возлюбил еси, душевными очима непрестанно созерцавый;
РАДУЙСЯ, Преподобие отче наш Макарие Жабынский чудотворче.
Кондак 11
Пение хвалебное приносим ти от смиренных сердец наших, преподобие отче Макарие; еже с любовию приемши моли Господа избавитися нам от бед и скорбей, наипаче же в час кончины нашея твоим заступлением предвари, да не умрем без покаяния, но сподобимся в небесных селениях с тобою воспети Богу: Аллилуиа.
Икос 11
Свеща еси в Церкви Христовой, явился еси горящи невещественным светом благодати Божия, оживляющая окаменевшая сердца наша, сего ради молим тя: просвети нас омраченные грехом да воспоем ти:
Радуйся, источниче в жизнь вечную текий;
Радуйся, ко спасению примером своим и житием многих привелый;
Радуйся, в лощениях и бдениях вкусивый духовныя сладости;
Радуйся, в молитвах твоих всенощных исполнялся божественныя радости;
Радуйся, в трудах твоих плоть смиривый;
Радуйся, образ терпения людем явивый.
РАДУЙСЯ, Преподобие отче наш Макарие Жабынский чудотворче.
Кондак 12
Благодать дана тебе от Бога во еже руководите ко спасению и сохраняти от бед чтущих память твою, честный отче. Мы же дивящися в тебе всемогуществу и благодати Божией вопием: Аллилуиа.
Икос 12
Поющи праведное житие твое славяше труды твоя в нихже восходил еси от силы в силу, зрим и исповедуем яко кончина твоя рождение бысть в жизнь приснотекущую, еяже струями благодатными и нас земных окропляеши, темже благодарственно воспевающе тя глаголем:
Радуйся, радости приобщивыйся, в печали сущих не забываяй;
Радуйся, сладости мира сего яко сор отреваяй;
Радуйся, яко душу твою слезами покаяния омыл еси;
Радуйся, яко ко Христу путем узким следовал еси;
Радуйся смирения образе, имже гордыню мира сего низложил еси;
Радуйся, яко горняго отечества достигнути всею душею возжелал еси;
РАДУЙСЯ, Преподобие отче наш Макарие Жабынский чудотворче.
Кондак 13
О предивный чудотворче и великий угодниче Христов, преподобие отче наш Макарие, приими от нас недостойных чад твоих убогое сие хваление, буди нам отец чадолюбивый, умоли Господа да избавит нас от всех бед и напастей, церковь свою сохранит, пастырей вразумит и всех нас ко Христу приведет, и на суде своем помилует, вопиющих ему: Аллилуиа.
(СЕЙ КОНДАК ЧИТАЙ ТРИЖДЫ)
Песнь 7
Ирмос: Богопротивное веление беззаконнующаго мучителя / высок пламень вознесло есть. / Христос же простре Богочестивым отроком росу духовную, / Сый благословен и препрославлен.
Сый благословенный Христос Бог наш / да избавит нас огня геенскаго, /со слезами покаянными о сем помолимся. / Кто же ныне даст очесем нашим источник слез, / аще не ты, отче, блаженство плача познавый в житии твоем.
Высокий пламень неверия и нечестия возносит беззаконнующий. / Но мы сохранити веру потщимся, / убежим нечестия, убоимся пламени геенскаго, / ко Христу притецем и у Него с Макарием блаженство улучим.
Един Сый Святыя Троицы, Христе Боже наш! / Сотвори в нас обитель, по обетованию твоему, / с Преблагословенным и Препрославленным Твоим Отцем и со Святым Духом, / жизни и утешения Подателем.
Богородичен: Радуйся, Владычице, и радость нам подаждь, от бед спаси, / в мире Церковь Твоего Сына сохрани, и умоли, да благословит яко достояние Свое.
Песнь 8
Ирмос: Пещь иногда огненная в Вавилоне действа разделяше, / Божиим велением халдеи опаляющая, / верныя же орашающая, поющия: / благословите вся дела Господня, Господа.
В телеси Ангела, почтим Макария, блаженству тезоименитого, и, подражая его житию во Христе, / поне единаго от блаженств Евангельских достигнути потщимся.
Огнь искушений греховных палит мя, / но страждущую мою душу ороси росою благодати Христовой / и твоими молитвами, блаженнее.
Да пребудет благословение твое Богоугодное во имя Пресвятой Троицы / на обители твоей, и на земли отечествия твоего, / и на всех. Тебе усердно призывающих, отче преподобне.
Богородичен: Доныне и во веки блажим Тя, вси роди, Святая Богородительница, / Спаси нас, яко Спаса родила еси душ наших.
Песнь 9
Ирмос: Безначальна Родителя Сын, Бог и Господь, / воплощься от Девы, нам явися, / омраченная просветити, собрати расточенная. / Тем Всепетую Богородицу величаем.
Со ангельскими чинми, хвалящими Господа, / и с Богородицею Того хвалити сподобился еси, / сподоби же и нас, преподобне отче наш, / да с тобою Господа славим и Богородицу величаем.
Ангели, вхождение Пречистыя во святая святых зряще, удивишася. / Мы же дивимся, / како во святый храм, трудами твоими созданный на месте, варвары разоренном, / чудотворною иконою Своею вниде Пречистая, / Юже, яко Всепетую Богородицу величаем.
Бога Отца прославим, тебе Богоносному отцу нашему последующе, / Божественного Сына возвеличим, / да с Ним и всыновление Отчее приимем, / Святому Духу поклонимся, да научит ны молитися, якоже подобает, / да и Сам, вопия в душах наших, / укрепит нас к Богу сыновнее вопити: Авво, Отче!
Богородичен: Радуйся, Радосте наша! / Пребуди с нами, яко да и Господь, Иже с Тобою, в нас пребудет. / Собери во двор церковный овцы расточенныя, / отпадшия возврати к соединению, /просвети омраченных неверием, / да вси вкупе Тя, Всепетую Богородицу, величаем.
МОЛИТВА ПРЕПОДОБНОМУ ОТЦУ НАШЕМУ
МАКАРИЮ ЖАБЫНСКОМУ И БЕЛЕВСКОМУ
ЧУДОТВОРЦУ
Преподобие отче наш Макарие угодниче Божий и сопричастниче ангелов, ты победоносно перенесший борьбу и страдания на земли и теперь в вечной радости и славе хвалящий и прославляющий Бога, приникни с блаженных высот взором своим на сию земную юдоль скорби и плача и, вспомни нас чад твоих, странствующих здесь под крестом и со слезами и воздыханиями направляющихся к своей цели! Молись о нас ко Господу, да приведет и нас Своею всемогущею благодатию в страну вечнаго блаженства, дабы и нам вместе с Тобою и всеми святыми прославлять Отца и Сына и Святаго Духа. Аминь.
МОЛИТВА 2.
О священная главо! Великий чудотворче преподобие отче наш Макарие, преблаженне и преславне духа святаго исполнение! Постников похвале, монашествующих славо, пустыни Жабынския возградителю, теплый о нас грешных молитвенниче, ныне со ангельскими воинствы предстояй у престола Царя славы Господа, и наслаждаяися света единосущныя Троицы и с горними силами воспеваяй трисвятую песнь яко дерзновение имея, молися всемилостивому владыце спасти вся верующая во имя его: испроси мир и тишину святым церквам низпослати, вере православней укрепление, видимыя и невидимыя враги низложити, грады утвердите, мир весь сохранити, моли милостиваго Бога да твоим благоприятным ходатайством вся православныя Христианы избавит он от глада, губительства, труса, потопа, огня, меча, от нашествия иноплеменник и междоусобныя брани, старыя да подкрепит юныя да наставит, немудрыя умудрит, болящия исцелит, плененныя и узники свободит, сироты заступит, младенцы воспитает и вся люди сохранит от всех бед и напастей и от нападения вражия и смертоносныя язвы и от всякого зла днесь же с верою приходящих рабов Твоих, и образ подобия Твоего любезно целующих яко теплый наш заступниче, сохрани и в скорбных обстояниях наших предстани, душевных и телесных страстей свободи: в день страшного суда шуяго стояния избави и с десными овцами молитвами твоими стати сподоби и слышати блаженный оный глас владыки Христа Бога нашего: приидите благословение Отца моего, наследуйте уготованное вам царство от сложения мира; Емуже подобает всякая слава честь и поклонение, со безначальным его Отцем, и со пресвятым и благим и животворящим его Духом ныне и присно и во веки веков. Аминь.
ТРОПАРЬ гл. 4
От мирскаго жития изшед, в тихое пристанище жизни иноческия, Преподобие Макарие, вшел еси, в нейже добре подвизався, душу твою добродетельми превысокими обогатил еси и явился еси добр пастырь и учитель иноческому собору. Емуже и обитель возградил еси. Таже в безмолвие вшед и боговедения сподобився ко Господу преставился еси иже даром чудес тя обогати. Его же ныне моли да спасет верою и любовию почитающих святую память твою.
КОНДАК гл. 8
Житие чистое, терпение, кротость и любовь нелицемерну, воздержание совершенное, умиление божественное, веру же и надежду истинну и милосердие стяжав равноангельно, Макарие, на земли пожил еси и на небеси Богови с лики безплотных предстоиши, с ними же святе молися мир Российстей Церкви даровати, и душам нашим велию милость.